27 ਸਾਲ ਪੁਰਾਣਾ ਨੀਂਹ ਪੱਥਰ ਕੰਮ ਸ਼ੁਰੂ ਹੋਣ ਦੀ ਉਡੀਕ ਵਿੱਚ

ਚਮਕੌਰ ਸਾਹਿਬ, 30 ਦਸੰਬਰ : ਕਈ ਸਾਲ ਪਹਿਲਾਂ ਰੱਖੇ ਗਏ ਨੀਂਹ ਪੱਥਰ ਅੱਜ ਵੀ ਸਰਕਾਰਾਂ ਦੀ ਬੇਰੁਖੀ ਦਾ ਸ਼ਿਕਾਰ ਹਨ। ਨਜ਼ਦੀਕੀ ਪਿੰਡ ਮਕੜੌਨਾਂ ਕਲਾਂ ਵਿੱਚ  28 ਸਤੰਬਰ 1986 ਨੂੰ ਰੱਖਿਆ ਸੜਕ ਨਿਰਮਾਣ ਦਾ ਨੀਂਹ ਪੱਥਰ 27 ਸਾਲ ਤੋਂ ਕੰਮ ਸ਼ੁਰੂ ਹੋਣ ਦੀ ਉਡੀਕ ਕਰ ਰਿਹਾ ਹੈ । ਇਹ ਨੀਂਹ ਪੱਥਰ ਉਸ ਸਮੇਂ ਦੀ ਸਰਕਾਰ ਦੇ ਰਾਜ ਮੰਤਰੀ ਭਵਨ ਤੇ ਮਾਰਗ ਨਿਰਮਾਣ ਪੰਜਾਬ ਮਰਹੂਮ ਰਾਜਿੰਦਰ ਸਿੰਘ ਧਾਲੀਵਾਲ ਵੱਲੋਂ ਪਿੰਡ ਡਹਿਰ ਤੱਕ ਬਣਨ ਵਾਲੀ ਲਿੰਕ ਸੜਕ ਲਈ ਰੱਖਿਆ ਗਿਆ ਸੀ। ਇਸੇ ਤਰ੍ਹਾਂ ਹੀ ਪਿੰਡ ਵਿੱਚ ਓਇੰਦ ਤੱਕ ਬਣਨ ਵਾਲੀ ਸੜਕ ਸਮੇਤ ਅੱਧੀ ਦਰਜਨ ਦੇ ਕਰੀਬ ਸੜਕਾਂ ਦੇ ਨੀਂਹ ਪੱਥਰ ਰੱਖੇ ਗਏ ਸਨ ।
ਪਿੰਡ ਵਾਸੀਆਂ ਮੁਤਾਬਕ  ਇਨ੍ਹਾਂ ਨੀਂਹ ਪੱਥਰਾਂ ਵਾਲੀਆਂ ਸੜਕਾਂ ਵਿੱਚੋਂ ਸਿਰਫ਼ ਇੱਕ ਸੜਕ ਹੀ ਬਣਾਈ ਗਈ ਹੈ । ਪਿੰਡ ਦੇ ਸਰਪੰਚ ਜਸਵੰਤ ਸਿੰਘ, ਸਾਬਕਾ ਸਰਪੰਚ ਭਿੰਦਰ ਕੌਰ, ਪੰਚ  ਸ਼ਮਸ਼ੇਰ ਸਿੰਘ,  ਜਰਨੈਲ ਸਿੰਘ, ਨੰਬਰਦਾਰ ਪ੍ਰੀਤਮ ਸਿੰਘ, ਗਿਆਨੀ ਅਮਨਦੀਪ ਸਿੰਘ, ਜਸਪ੍ਰੀਤ ਸਿੰਘ ਅਤੇ ਅਵਤਾਰ ਸਿੰਘ ਆਦਿ ਨੇ ਦੱਸਿਆ ਸੜਕ ਨੂੰ ਬਣਾਉਣ ਲਈ ਉਹ ਲੋਕ ਨਿਰਮਾਣ ਮੰਤਰੀ ਨੂੰ ਮਿਲੇ ਸਨ । ਉਨ੍ਹਾਂ ਸੜਕ ਨੂੰ ਬਣਾਉਣ ਸਬੰਧੀ ਹਲਕਾ ਇੰਚਾਰਜ ਬੀਬੀ ਸਤਵੰਤ ਕੌਰ ਸੰਧੂ ਤੋਂ ਅਰਜੀ ਮਾਰਕ ਕਰਵਾਉਣ ਲਈ ਕਿਹਾ ਸੀ ਅਤੇ ਇਹ ਅਰਜੀ ਬੀਬੀ ਸੰਧੂ ਤੋਂ ਮਾਰ ਕਰਵਾ ਕੇ ਭੇਜ ਦਿੱਤੀ ਗਈ ਹੈ ਪਰ ਫਿਰ ਵੀ ਹਾਲੇ ਤੱਕ ਇਸ ਸੜਕ  ਦਾ ਕੰਮ ਸ਼ੁਰੂ ਨਹੀਂ ਹੋਇਆ। ਉਨ੍ਹਾਂ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਕਿ ਇਸ ਸੜਕ ਨੂੰ ਜਲਦ ਬਣਾਇਆ ਜਾਵੇ।