ਰੂਸ ਦੇ ਵੋਲਗੋਗਰਾਦ ਸ਼ਹਿਰ ਵਿਚ ਇਕ ਰੇਲਵੇ ਸਟੇਸ਼ਨ 'ਤੇ ਆਤਮਘਾਤੀ ਔਰਤ ਹਮਲਾਵਰ ਵੱਲੋਂ ਕੀਤੇ ਗਏ ਬੰਬ ਧਮਾਕੇ ਵਿਚ ਘੱਟੋ ਘੱਟ 18 ਵਿਅਕਤੀ ਮਾਰੇ ਗਏ ਤੇ ਦਰਜਨਾਂ ਹੋਰ ਜ਼ਖਮੀ ਹੋ ਗਏ | ਅਧਿਕਾਰੀਆਂ ਅਨੁਸਾਰ ਆਤਮਘਾਤੀ ਔਰਤ ਨੇ ਸ਼ਹਿਰ ਦੇ ਮੁੱਖ ਰੇਲਵੇ ਸਟੇਸ਼ਨ ਦੇ ਪ੍ਰਵੇਸ਼ ਦਰਵਾਜ਼ੇ ਨਾਲ ਰੱਖੇ ਮੈਟਲ ਡਿਟੈਕਟਰ ਨੇੜੇ ਆਪਣੇ ਆਪ ਨੂੰ ਬੰਬ ਨਾਲ ਉਡਾ ਦਿੱਤਾ | ਉਸ ਸਮੇਂ ਰੇਲਵੇ ਸਟੇਸ਼ਨ 'ਤੇ ਮੁਸਾਫਿਰਾਂ ਦੀ ਭਾਰੀ ਭੀੜ ਸੀ | ਅੱਤਵਾਦ ਵਿਰੋਧੀ ਕੌਮੀ ਕਮੇਟੀ ਨੇ ਇਕ ਬਿਆਨ ਵਿਚ ਕਿਹਾ ਹੈ ਕਿ ਮੁਢਲੀ ਜਾਣਕਾਰੀ ਅਨੁਸਾਰ ਹਮਲਾਵਰ ਔਰਤ ਸੀ | ਖੇਤਰੀ ਸਰਕਾਰ ਦੇ ਇਕ ਬੁਲਾਰੇ ਨੇ ਦੱਸਿਆ ਕਿ ਹਮਲੇ ਵਿਚ 18 ਵਿਅਕਤੀ ਮਾਰੇ ਗਏ ਹਨ ਤੇ 40 ਤੋਂ ਵੱਧ ਜ਼ਖਮੀ ਹੋਏ ਹਨ | ਸੰਘੀ ਸਿਹਤ ਮੰਤਰਾਲੇ ਦੇ ਬੁਲਾਰੇ ਨੇ ਜ਼ਖਮੀਆਂ ਦੀ ਗਿਣਤੀ 50 ਤੋਂ ਜ਼ਿਆਦਾ ਦੱਸੀ ਹੈ | ਵੋਲਗੋਗਰਾਦ ਜਿਸ ਨੂੰ ਸੋਵੀਅਤ ਸੰਘ ਵੇਲੇ ਸਟਾਲਿਨਗਰਾਦ ਦੇ ਨਾਂਅ ਨਾਲ ਜਾਣਿਆ ਜਾਂਦਾ ਸੀ, ਵਿਚ ਅਕਤੂਬਰ 'ਚ ਵੀ ਹਮਲਾ ਹੋ ਚੁੱਕਾ ਹੈ | 21 ਅਕਤਬੂਰ ਨੂੰ ਬੱਸ ਵਿਚ ਹੋਏ ਆਤਮਘਾਤੀ ਬੰਬ ਧਮਾਕੇ 'ਚ 6 ਵਿਅਕਤੀ ਮਾਰੇ ਗਏ ਸਨ | ਇਥੋਂ ਨੇੜੇ ਸੋਚੀ ਵਿਖੇ ਫਰਵਰੀ ਵਿਚ ਉਲੰਪਿਕ ਖੇਡਾਂ ਹੋ ਰਹੀਆਂ ਹਨ | ਇਨ੍ਹਾਂ ਖੇਡਾਂ ਤੋਂ ਪਹਿਲਾਂ ਹੋਏ ਸ਼ਕਤੀ ਸ਼ਾਲੀ ਆਤਮਘਾਤੀ ਬੰਬ ਧਮਾਕੇ ਨੇ ਸੁਰੱਖਿਆ ਅਧਿਕਾਰੀਆਂ ਦੀ ਚਿੰਤਾ ਵਧਾ ਦਿੱਤੀ ਹੈ | ਇਨ੍ਹਾਂ ਧਮਾਕਿਆਂ ਨੂੰ ਰੂਸ ਦੇ ਅਸ਼ਾਂਤ ਉੱਤਰੀ ਕਾਕੇਸ਼ੀਆ ਖੇਤਰ ਵਿਚ ਸੰਘੀ ਫੋਰਸਾਂ ਨਾਲ ਲੜ ਰਹੇ ਇਸਲਾਮੀ ਬਾਗੀਆਂ ਨਾਲ ਜੋੜਿਆ ਜਾਂ ਰਿਹਾ ਹੈ | ਅੱਤਵਾਦੀ ਪੂਰੇ ਕਾਕੇਸ਼ੀਆ ਖੇਤਰ 'ਚ ਇਸਲਾਮਿਕ ਰਾਜ ਲਾਗੂ ਕਰਨ ਦੀ ਮੰਗ ਕਰ ਰਹੇ ਹਨ | ਬਾਗੀਆਂ ਦੇ ਆਗੂ ਡੋਕੂ ਉਮਾਰੋਵ ਨੇ ਖੇਤਰ ਤੋਂ ਬਾਹਰ ਆਮ ਨਾਗਰਿਕਾਂ ਨੂੰ ਨਿਸ਼ਾਨਾ ਬਣਾਉਣ ਤੇ ਉਲੰਪਿਕ ਖੇਡਾਂ ਵਿਚ ਵਿਘਨ ਪਾਉਣ ਦੇ ਆਦੇਸ਼ ਦਿੱਤੇ ਹਨ | ਇਸੇ ਦੌਰਾਨ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਸੁਰੱਖਿਆ ਨੂੰ ਯਕੀਨੀ ਬਣਾਉਣ ਵਾਸਤੇ ਸਬੰਧਤ ਏਜੰਸੀਆਂ ਨੂੰ ਸਾਰੇ ਲੋੜੀਂਦੇ ਕਦਮ ਚੁੱਕਣ ਦਾ ਆਦੇਸ਼ ਦਿੱਤਾ ਹੈ | ਉਨ੍ਹਾਂ ਨੇ ਰੇਲਵੇ ਸਟੇਸ਼ਨਾਂ ਤੇ ਹਵਾਈ ਅੱਡਿਆਂ ਉੱਪਰ ਸੁਰਖਿਆ ਵਧਾਉਣ ਲਈ ਕਿਹਾ ਹੈ |
No comments:
Post a Comment