ਤੇਜ਼ਾਬੀ ਹਮਲਿਆਂ ਨਾਲ ਸਰਾਪੀਆਂ ਜ਼ਿੰਦਗੀਆਂ....

ਪੰਚਾਇਤੀ ਜ਼ਮੀਨ ਨੂੰ ਨਾਜਾਇਜ਼ ਕਬਜ਼ਿਆਂ ਤੋਂ ਬਚਾਉਣ ਦਾ ਭੁਗਤਣਾ ਪਿਆ ਖਮਿਆਜ਼ਾ

ਸਾਬਕਾ ਮਹਿਲਾ ਸਰਪੰਚ ਤੇਜ਼ਾਬੀ ਹਮਲੇ ਤੋਂ ਬਾਅਦ ਖੁਦ ਇਨਸਾਫ਼ ਲਈ ਲਗਾ ਰਹੀ ਗੁਹਾਰ

ਘੁਮਾਣ.. P ਜ਼ਿਲ੍ਹਾ ਗੁਰਦਾਸਪੁਰ ਦੇ ਕਸਬਾ ਘੁਮਾਣ ਦੇ ਨਜ਼ਦੀਕ ਪਿੰਡ ਕੰਡੀਲਾ ਵਿਖੇ ਇਕ ਮਹਿਲਾ ਸਾਬਕਾ ਸਰਪੰਚ ਨੂੰ ਪੰਚਾਇਤੀ ਜ਼ਮੀਨ ਨੂੰ ਨਾਜਾਇਜ਼ ਕਬਜ਼ਿਆਂ ਤੋਂ ਬਚਾਉਣ ਦਾ ਖਮਿਆਜਾ ਤੇਜ਼ਾਬੀ ਹਮਲੇ ਨਾਲ ਭੁਗਤਣਾ ਪਿਆ | 2003 'ਚ ਪਰਮਜੀਤ ਕੌਰ ਪਤਨੀ ਸਵਰਗੀ ਹਰਭਜਨ ਸਿੰਘ ਵਾਸੀ ਕੰਡੀਲਾ ਸਰਪੰਚ ਚੁਣੀ ਗਈ | 2003 ਤੋਂ 2007 ਤੱਕ ਲਗਾਤਾਰ ਪਿੰਡ 'ਚ ਸਰਪੰਚੀ ਕੀਤੀ, ਪਰ ਪਿੰਡ ਦੇ ਹੀ ਕੁਝ ਲੋਕਾਂ ਨੂੰ ਇਹ ਹਜ਼ਮ ਨਾ ਹੋਇਆ ਅਤੇ ਪਰਮਜੀਤ ਕੌਰ ਦੀ ਸਰਪੰਚੀ ਵਿਚ ਅੜਿੱਕਾ ਬਣਨ ਲੱਗ ਪਏ | ਵਿਰੋਧੀ ਧਿਰ ਦੇ ਕੁਝ ਲੋਕਾਂ ਵੱਲੋਂ ਪੰਚਾਇਤੀ ਜ਼ਮੀਨ 'ਤੇ ਨਾਜਾਇਜ਼ ਕਬਜ਼ੇ ਨੂੰ ਲੈ ਕੇ ਕਸਮਕਸ ਸ਼ੁਰੂ ਹੋ ਗਿਆ, ਪਰ 30 ਅਕਤੂਬਰ, 2006 ਨੂੰ ਘਰੇਲੂ ਜ਼ਮੀਨੀ ਝਗੜੇ ਦੌਰਾਨ ਹਰਭਜਨ ਸਿੰਘ ਦਾ ਕਤਲ ਹੋ ਗਿਆ | ਜਿਸਦਾ ਫਾਇਦਾ ਉਠਾਉਂਦਿਆਂ ਵਿਰੋਧੀ ਧਿਰ ਦੇ ਲੋਕਾਂ ਵੱਲੋਂ ਇਸ ਮਹਿਲਾ ਸਰਪੰਚ ਨੂੰ ਦਬਾਉਣ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਪਰਮਜੀਤ ਕੌਰ ਵੱਲੋਂ ਪੰਚਾਇਤੀ ਜ਼ਮੀਨਾਂ ਦੇ ਨਾਜਾਇਜ਼ ਕਬਜ਼ਿਆਂ ਦਾ ਵਿਰੋਧ ਕੀਤਾ ਤਾਂ ਇਸ ਪਰਮਜੀਤ ਕੌਰ ਨੂੰ ਤੇਜ਼ਾਬੀ ਹਮਲੇ ਦਾ ਸ਼ਿਕਾਰ ਹੋਣਾ ਪਿਆ | ਤੇਜ਼ਾਬੀ ਹਮਲੇ ਦੀ ਸ਼ਿਕਾਰ ਪਰਮਜੀਤ ਕੌਰ, ਲੜਕੇ ਰਵਿੰਦਰ ਸਿੰਘ, ਰਾਜਬੀਰ ਸਿੰਘ, ਭਤੀਜਾ ਤੇਜਿੰਦਰ ਸਿੰਘ ਅਤੇ ਨਜ਼ਦੀਕੀ ਰਿਸ਼ਤੇਦਾਰ ਸਤਨਾਮ ਸਿੰਘ ਨੇ ਭਰੇ ਮਨ ਨਾਲ ਦੱਸਿਆ ਕਿ ਸਮਾਂ ਸਵੇਰੇ 4 ਵਜੇ ਦਾ ਸੀ, ਅਸੀਂ ਆਪਣੇ ਘਰ ਵਿਚ ਅਰਾਮ ਦੀ ਨੀਂਦ ਸੋ ਰਹੇ ਸੀ ਕਿ ਪਿੰਡ ਦੇ ਹੀ ਤਿੰਨ ਨੌਜਵਾਨ ਘਰ ਦੀ ਕੰਧ ਟੱਪ ਕੇ ਘਰ 'ਚ ਦਾਖ਼ਲ ਹੋ ਗਏ ਅਤੇ ਉਨ੍ਹਾਂ ਪਰਮਜੀਤ ਕੌਰ 'ਤੇ ਤੇਜ਼ਾਬ ਦੀ ਭਰੀ ਕੈਨੀ ਸੁੱਟ ਦਿੱਤੀ ਅਤੇ | ਦੋਸ਼ੀਆਂ ਦੀ ਪਛਾਣ ਦੌੜਨ ਦੌਰਾਨ ਘਰੇਲੂ ਮੈਂਬਰਾਂ ਵੱਲੋਂ ਕਰ ਲਈ ਗਈ | ਪਰਮਜੀਤ ਕੌਰ ਨੂੰ ਪਹਿਲਾਂ ਸਿਵਲ ਹਸਪਤਾਲ ਬਟਾਲਾ ਵਿਖੇ ਲਿਜਾਇਆ ਗਿਆ ਪਰ ਤੇਜ਼ਾਬ ਦਾ ਅਸਰ ਬੇਹੱਦ ਜ਼ਿਆਦਾ ਹੋਣ ਕਾਰਨ ਚਿਹਰਾ ਅਤੇ ਸਰੀਰ ਕਾਫ਼ੀ ਹੱਦ ਤੱਕ ਸੜ ਚੁੱਕਾ ਸੀ, ਡਾਕਟਰਾਂ ਨੇ ਉਸ ਨੂੰ ਅੰਮਿ੍ਤਸਰ ਦੇ ਇਕ ਨਿੱਜੀ ਹਸਪਤਾਲ ਵਿਚ ਭੇਜ ਦਿੱਤਾ, ਪਰ ਉਥੋਂ ਦੇ ਡਾਕਟਰਾਂ ਨੇ ਉਸੇ ਹੀ ਦਿਨ ਪੀ.ਜੀ.ਆਈ. ਚੰਡੀਗੜ੍ਹ ਵਿਖੇ ਭੇਜ ਦਿੱਤਾ ਗਿਆ | ਪੀ. ਜੀ. ਆਈ. 'ਚ ਡੇਢ ਸਾਲ ਲਗਾਤਾਰ ਇਲਾਜ ਚੱਲਿਆ |
ਸਾਰੀ ਜ਼ਮੀਨ 'ਤੇ ਕਰਜ਼ਾ ਚੁੱਕ ਕੇ ਇਲਾਜ ਕਰਵਾਇਆ
ਪੀੜਤ ਦੇ ਲੜਕੇ ਰਵਿੰਦਰ ਸਿੰਘ ਅਤੇ ਰਾਜਬੀਰ ਸਿੰਘ ਨੇ ਦੱਸਿਆ ਕਿ ਪਿਤਾ ਦੀ ਮੌਤ ਤੋਂ ਬਾਅਦ ਸਾਰੀ ਜਿੰਮੇਵਾਰੀ ਸਾਡੇ ਛੋਟੇ ਹੋਣ ਕਾਰਨ ਸਾਡੀ ਮਾਂ 'ਤੇ ਹੀ ਸੀ | ਪਿਤਾ ਦੇ ਚਲੇ ਜਾਣ ਤੋਂ ਬਾਅਦ ਮਾਂ ਨੇ ਕਦੇ ਵੀ ਪਿਤਾ ਦੀ ਕਮੀ ਮਹਿਸੂਸ ਨਹੀਂ ਹੋਣ ਦਿੱਤੀ | ਉਨ੍ਹਾਂ ਮਾਂ ਨੂੰ ਬਚਾਉਣ ਲਈ ਮਹਿੰਗੇ ਇਲਾਜ ਕਾਰਨ ਸਾਰੀ ਜ਼ਮੀਨ ਗਹਿਣੇ ਪਾ ਦਿੱਤੀ ਅਤੇ ਜ਼ਮੀਨ 'ਤੇ ਕਰਜ਼ਾ ਚੁੱਕ ਕੇ ਮਾਂ ਦੇ ਮੂੰਹ ਦੀਆਂ 5 ਮਹਿੰਗੀਆਂ ਸਰਜਰੀਆਂ ਕਰਵਾਈਆਂ |
ਇਨ੍ਹਾਂ ਸਰਜਰੀਆਂ 'ਤੇ 25 ਲੱਖ ਰੁਪਏ ਤੋਂ ਵੱਧ ਦਾ ਖਰਚਾ ਆ ਚੁੱਕਾ ਹੈ | 6 ਸਾਲ ਬੀਤ ਜਾਣ ਦੇ ਬਾਵਜੂਦ ਇਲਾਜ ਅਧੂਰਾ ਹੈ | ਡਾਕਟਰਾਂ ਦੇ ਕਹਿਣ ਮੁਤਾਬਕ ਅਜੇ ਵੀ 3 ਸਰਜਰੀਆਂ ਬਾਕੀ ਹਨ, ਪਰ ਆਰਥਿਕ ਤੰਗੀ ਹੋਣ ਕਾਰਨ ਉਹ ਇਲਾਜ ਲਈ ਬੇਹੱਦ ਬੇਵੱਸ ਹੋ ਗਏ ਹਨ |
ਅੱਖਾਂ ਦੀ ਰੌਸ਼ਨੀ ਸਦਾ ਲਈ ਚਲੀ ਗਈ
ਪਰਮਜੀਤ ਕੌਰ ਨੇ ਦੱਸਿਆ ਕਿ ਇਸ ਤੇਜ਼ਾਬੀ ਹਮਲੇ ਕਾਰਨ ਅੱਖਾਂ ਦੀ ਰੋਸ਼ਨੀ ਸਦਾ ਲਈ ਅਲੋਪ ਹੋ ਗਈ ਹੈ | ਡਾਕਟਰਾਂ ਨੇ ਅੱਖਾਂ ਬਚਾਉਣ ਦੀ ਬੇਹਦ ਕੋਸ਼ਿਸ਼ ਕੀਤੀ, ਪਰ ਅਖੀਰ ਡਾਕਟਰਾਂ ਨੇ ਅੱਖਾਂ ਵਿਚ ਕਦੇ ਵੀ ਰੋਸ਼ਨੀ ਨਾ ਆਉਣ ਦਾ ਕਹਿ ਕੇ ਘਰ ਵਾਪਿਸ ਭੇਜ ਦਿੱਤਾ ਅਤੇ ਪਿਛਲੇ 6 ਸਾਲਾਂ ਤੋਂ ਆਪਣੇ ਦੋਵਾਂ ਪੁੱਤਰਾਂ ਦੇ ਆਸਰੇ ਨਾਲ ਜੀਵਨ ਬਤੀਤ ਕਰ ਰਹੀ ਹਾਂ |
ਸਰਕਾਰ ਵੱਲੋਂ ਕੋਈ ਮਾਲੀ ਸਹਾਇਤਾ ਨਹੀਂ ਮਿਲੀ
ਪੀੜਤਾ ਨੇ ਦੱਸਿਆ ਕਿ ਸਰਕਾਰੀ ਜਾਇਦਾਦ ਨੂੰ ਬਚਾਉਂਦਿਆਂ ਆਪਣਾ-ਆਪ ਅਤੇ ਮਿਹਨਤ ਨਾਲ ਕੀਤੀ ਕਮਾਈ ਨੂੰ ਗਵਾਉਣ ਤੋਂ ਇਲਾਵਾ ਪੰਜਾਬ ਸਰਕਾਰ ਨੇ ਕਿਸੇ ਤਰ੍ਹਾਂ ਦੀ ਕੋਈ ਵੀ ਮਾਲੀ ਸਹਾਇਤਾ ਨਹੀਂ ਦਿੱਤੀ | ਉਨ੍ਹਾਂ ਕਿਹਾ ਕਿ ਮੈਂ ਇਕ ਸਰਪੰਚ ਹੁੰਦਿਆਂ ਸਰਕਾਰੀ ਜਾਇਦਾਦ ਨੂੰ ਬਚਾਉਂਦਿਆਂ ਏਨਾ ਵੱਡਾ ਨੁਕਸਾਨ ਕਰਵਾਇਆ ਹੈ, ਸਰਕਾਰ ਇਸ ਦੇ ਬਦਲੇ ਮੇਰੇ ਦੋਵਾਂ ਲੜਕਿਆਂ ਨੂੰ ਸਰਕਾਰੀ ਨੌਕਰੀ ਦੇਵੇ |
ਦੋਸ਼ੀਆਂ ਨੂੰ ਕੀ ਸਜ਼ਾ ਮਿਲੀ? 
28 ਦਸੰਬਰ, 2007 ਦੀ ਇਸ ਤੇਜ਼ਾਬੀ ਹਮਲੇ ਦੀ ਘਟਨਾ ਤੋਂ ਬਾਅਦ 30 ਦਸੰਬਰ, 2007 ਨੂੰ ਸਾਬਕਾ ਸਰਪੰਚ ਪਰਮਜੀਤ ਕੌਰ ਦੇ ਬਿਆਨਾਂ ਦੇ ਆਧਾਰ 'ਤੇ ਮੁਕੱਦਮਾ ਨੰਬਰ 207 ਜੁਰਮ 307, 452, 427, 34 ਆਈ.ਪੀ.ਸੀ. ਐਕਟ ਅਧੀਨ ਤਰਸੇਮ ਸਿੰਘ ਪੁੱਤਰ ਮੁਹਿੰਦਰ ਸਿੰਘ, ਸਤਨਾਮ ਸਿੰਘ ਪੁੱਤਰ ਮੁਹਿੰਦਰ ਸਿੰਘ, ਨਿਸ਼ਾਨ ਸਿੰਘ ਪੁੱਤਰ ਅਮਰੀਕ ਸਿੰਘ ਵਾਸੀ ਕੰਡੀਲਾ 'ਤੇ ਥਾਣਾ ਘੁਮਾਣ ਵਿਖੇ ਮੁਕੱਦਮਾ ਦਰਜ ਕਰ ਦਿੱਤਾ ਗਿਆ | ਜਿਨ੍ਹਾਂ ਨੂੰ ਮਾਣਯੋਗ ਅਦਾਲਤ ਨੇ 7-7 ਸਾਲ ਦੀ ਸਜ਼ਾ ਸੁਣਾ ਦਿੱਤੀ, ਪਰ ਦੋਸ਼ੀ ਕੁਝ ਕੁ ਸਮਾਂ ਜੇਲ੍ਹ ਵਿਚ ਰਹਿ ਕੇ ਜਮਾਨਤਾਂ ਕਰਵਾ ਕੇ ਬਾਹਰ ਆ ਗਏ |